Igandetik desagertuta dago Alustiza, eta tolosarraren autoa aurkitu du Azpeitiko Udaltzaingoak gaur, asteartea, goizeko 10:50ak inguruan, Azpeitiko Urola kalean. Autoa aurkitu badute ere ez da Alustiza frantziskotarraren arrastorik.
Segurtasun Sailak jakitera eman duenez larrialdi zerbitzuek bilaketa dispositiboa jarri dute martxan. Ertzaintza, Gurutze Gorria, DYA eta Babes Zibileko kideez gain, mendi eta urpeko erreskateko unitateak ere ari dira bilaketa lanetan, txakurren laguntzaz. Helikoptero bat ere mobilizatu du poliziak.
#Azpeitia 84 urteko gizonaren bila jarraitzen dugu @112_SOSDeiak @ertzaintzaEJGV @CRGipuzkoa-rekin batera. #mendian pic.twitter.com/5oNJoqkN8m
— DYA Gipuzkoa (@DYAGipuzkoa) 2016(e)ko apirilak 5
Igandean Loiola Hotelean bazkaldu zuen senideekin, eta handik atera zenetik ez dute haren berririk. Azpeitiko Adinekoen Zentroan bizi den arrebari bisita egitera zihoala aipatu zuen, baina ez zen agertu. Loiola eta Urola Kalearen arteko errepide ingurak miatzen ibili da Ertzaintza, baita Tolosa eta Azpeitia arteko bi bideak: Udana eta Urraki.