13:20ak aldera izan da gertakaria, A-15 errepiderako Leitzako sarbidean. Dirudienez, garraiolariaren eta ertzainaren artean eztabaida piztu da, baina ikertzen ari dira arrazoiak. Agentea autotik atera da, eta armarekin tiro egin dio. Horietako batek, behintzat, buruan eman dio garraiolariari.
Europa Press agentziaren arabera, Iruñean bizi da ertzaina, eta Tolosako ertzain etxera zihoan, lanera. Estefania Beltran de Heredia segurtasun sailburuak atxiloketa baieztatu du, eta dituen datuen arabera "ertzainak ez du arauzko arma erabili". Aldiz, Noticias de Navarra egunkariaren arabera, autoan arauzko arma zeraman atxilotuak.
Nafarroako polizia kasua ikertzen ari da. Bien bitartean, Ertzaintzak ez du honen inguruko adierazpenik egingo, informazio gehiagorik izan ezean.