Iratzargailua 07:30en bueltan jo eta jo hasiko zen, gaur, Tolosako hamaika etxetan. Begiak ireki, Zaldunita eguna dela gogoratu eta presaka peluka eta pijamarekin kalera irteteko atondu dira inauterizaleak, leihotik eguraldiari begiratu ondoren.
Euri langarra, euria, zerua gris. "Ostegun Gizeneko eguraldirik balego..." pentsatu dute askok. baina ezkaratzeko atera ireki, eta beste dozenaka herritar ere Dianara doazela ikusteak, inauteri grina are gehiago piztu die.
Agintari kaleak aterki koloredunen desfile bat zirudien 08:00ak jo ondoren, eta eguraldia gai nagusi izan arren, poza ze aterkipeko tolosarren sentimendu bakarra. Poza, mozorrotzeko eguna iritsi delako; poza, Tolosako inauteriek meteorologiaren beharrik ez dutelako; poza, beste urtebetez Galtzaundi eta Pello ziri-ziriren doinura, egunari ekin diotelako.
Eta behin Zaldunita lehertu dela iragarri eta ospatu ondoren, tradizio edo ohitura onenei heldu, eta kafetegien babesean hartu dute aterpe inauterizaleek, kafesne beroaz gorputza egun osorako epeltzeko.
