Txistulariak, eguneko protagonistak

Eta zalapartaren ondoren barealdia etorri da. Ostegun Gizeneko iskanbilak Ostiral Meheko lasaitasunari eman dio bide, eta gaurkoan ia-ia edozein ostiraleko giroa dago Tolosan. Baina ezin beste alde batera begiratu, inauterietan gaude bete betean, eta Tolosan, nola ez, gaurkoan badira ere hori argi uzten duten zantzuak; Renferen tren geltokiaren aurreko plazan dauden barrakak edota San Frantzisko kalean festarik festa ibiltzen diren saltokiak esaterako. Baina hori baino gehiago ere bada gaur goizean Tolosan: txistulariak. Izan ere, Ostiral Mehe tristeak alaitzeaz arduratzen dira urtero Ozenki txistulari taldekoak. Musika eskolatik ateratzen dira urtero, eta aurten artzain-andrez jantzita atera dira kalejirara.