Koro Mokoroa: «Datuak oso gordinak dira; egoera beltza da»

Udarekin batera sumatu al dituzu bisitariak hotelean?
Tolosaldeko turismoak ez du eragin handirik izaten. Enpresa alorrarekin lotura handiagoa izaten dugu. Baina argi esanda, egoera oso gaizki dago. Prezioak harrika bota ditugu, eskaintza bereziak,... baina ez.
Uda, sanferminak... zerbait.
San Ferminetan Iruñean ere beste urteetan dena betetzen zen, eta aurten %80 bakarrik. Gure kasuan, Donostian betetzen direnean etortzen dira, eta aurten, hori ere ez. Normalean Tolosaldera turistak egun pasa etortzen dira, hiriburuan lo egiteko lekua hartuta. Zenbakiak oso gordinak dira. Eta pentsa, guk ez dugu udan bakarrik lan egiten, urte guztian egin beharra daukagu.
Eta enpresa alorrean, krisia.  
Hotelak 17 urte ditu, eta azken lauretan eragina handia izaten ari da. Papergintzaren inguruan lehen mugimendua izaten zen, oso ondo edo ondo gindoazen. Krisiak arlo horretan ere geldialdia ekarri du.
Denaren beharra, beraz.
Seinalizazioa aipatu gabe ez dut nahi gelditu. Hiri handi batera joatean hotelak non dauden leku guztietan ikusten duzu. Tolosan, non ikusten duzu horrelako seinale bat. Jarri izan ditugu, eta kentzeko agindu digute. Esanguratsua da. Behinik behin, GPS-ean gaude, ongi ordainduta, hori bai.
Lan orduak etxera doaz, beraz.
Gogorra da, zoazen lekura joanda ere, burua bueltaka dabilelako. Egoera beltza da.