Tolosako Nazioarteko Txotxongilo Etxeak, Topic-ek, beste sari bat eskuratu du. Oraingoan Rosa Maria Garcia Cano Saria eman diote gazteak arte eszenikoen mundura gerturatzeko diseinatzen dituen heziketa programengatik. Saria Cívitasek antolatzen du, Ciudad Rodrigoko (Gaztela eta Leon, Salamanca, Espainia) kultur taldeak, eta Gaztela eta Leongo Antzerki Azokaren barruan jasoko du saria.
Epaimahaiak Topic-ek egiten duen lana aitortu du sari honen bidez, eta saria ematerakoan "egitasmo berezia" dela nabarmendu du; "txotxongiloen zabalkundea egiten duten lana txalogarria da", esan dute. Zentroak hezkuntza eta formakuntzan egiten duen lana goraipatu dute. Topic-ek duen digitalizatutako dokumentazio guztia eta 1.800 txotxongiloko bilduma ere aipatu dituzte.
Saria abuztuaren 27an jasoko dute Montarco Jauregian, Gaztela eta Leongo 17. Antzerki Azokaren barruan.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!
