Tolosaldeko Bilgune Feministako Aloña Lertxundik eta Olaia Uzkudunek gidatutako mahai inguruan Begoña Garmendiak eta Begoña Zabalak hartuko dute parte.
Ataria irratiak Begoña Garmendia abokatu eta feministaekin hitz egin du, eta bertan, besteak beste, PPren gobernuak indarrean jarri nahi duen Abortoaren Legearen erreforma atzera pauso nabarmena dela esan du. "Atzera eramaten gaitu, eta ez bakarrik 1985. urtera arte, zeren orduan eman zen abortoaren hainbat kasutan onartu zuen legea, eta orain onartu nahi duten legea hura baino estuagoa da oraindik. Alde batetik, baldintzetako bat kentzen du, fetuaren bideragarritasun eza edota malformazioak eta abarrengatik aurreikusitako baldintza hain zuzen, eta bestetik, emakumeari abortatu ahal izateko jartzen zaizkion baldintzak handiagoak dira", gaineratu du.