Pasa den ostegunetik erosi ahal dira inauterietarako zezen plazako ikuskizunetarako sarrerak. Gaur arte, ordea, internetez, www.bibe.me atariaren bidez, bakarrik erosi ahal izan dira. Sarreren erdiak internet bidez jarri dituzte salgai, eta beste erdiak Leidorreko leihatilan.
Leihatilan gaurtik aurrera erosi ahal dira sarrerak, eta horregatik egin dira ilara luzeak antzoki inguruan. Leihatila 16:00etatik 20:00etara zabalduko dute, baina jendea goizeko zortzirak inguruan ilaran zegoen jada. Udaletxeak banatu eta zigilatutako tiketak ere banatu dituzte ilaran zegoen jendearen artean, hurrenkera errespetatzeko.
Leidorreko ilarak arintzeko asmoz, sei salementa puntu berri jarri dituzte bertan, eta baita erosle bakoitzak eskuratu ditzakeen sarrera kopurua murriztu ere. Aurten bakoitzak 10 sarrera erosi ahal izango ditu gehienez.
Internet bidez
Esan bezala, interneteko sarrerak ostegunean jarri zituzten salgai, eta ostiralerako erdiak salduta zeuden. Normaltasunez eta arazorik gabe joan zen salmenta, eta denera 7.500 sarrera saldu zituzten; Ostegun Gizen, Zaldunita eta Asteartitarako 1.400 eta 1.300 Astelenitarako.