Bi lasterketa egin dira aurten ere, 21 kilometrokoa eta 8,3 kilometrokoa. Lasterketa luzean, 86 korrikalarik hartu dute parte eta denbora hoberena Iñaki Olano altzotarrak egin du: 1:28:39 zehazki. Errekor berria jarri du gainera, azken marka bi minutuan jaitsita. Helmugaratzen bigarrena Julen Azkue tolosarra izan da, 1:31:40ko denboran eta bere atzetik sartu da Goar Lopetegi ibartarra, 1:33:20ean. Gizonezkoen podiuma, beraz, eskualdean geratu da.
Emakumeetan helmuga gurutzatzen lehena Alizia Olazabal izan da, 1:54:43ko denboran. Honek eraman du beteranoetan emakumezkoen lehen saria ere. Bigarren postuan, gertu izan du Laiane Arrospide ibartarra, 1:55:11n helmugaratuta, eta atzetik, Maialen Gurrutxaga izan da, 1:57:39ko denboran. Gurrutxaga, bere anaia Mikelekin batera helmugaratu da, eta lehen bikotea izan da 21 kilometroak betetzen. Beteranoetan beste saria Jexux Iturriak eskuratu du.
Ibilbidean Ibiur urtegira jaitsi dira eta handik Gaintzara igo dira. Ondoren, Altzagaratetik igaro ondoren, Baliarrain aldera joan dira eta handik berriro Ibiur urtegira jaitsi eta bukatzeko Orendainera igo dira. Guztira 730 metro positiboko aldapa izan dute.
