Atzo, ohi moduan, dantzariak eta txantxoak baserriz baserri aritu ziren puska biltzen. Gaur, herrian zehar aritu dira. Goizeko hamabietan egin dute hitzordua elkartean, eta hamaiketakoa jan ostean, abiatu dira kalean barrena. Gaztetxo eta haur ugari elkartu dira, behor eta guzti, herriko txoetan geldialdiak eginez, eta dantzak eta musika eskainiz.
Dantzariek eta txistulariek dantza eta musika jarri dute, eta ibilbide guztian zehar lagun izan dituzte herritarrak. Gaurkoan, gainera, horietako askok berriro mozorrotzera animatu dira. Segizioaren atzetik gurdia joan da.
Ibilbidea amaituta, inauterietako dantzen emanaldia egin dute plazan, eta ondoren, indarrak berreskuratzeko bazkaria izan dute. Arratsaldean ere izango da zertaz gozatu Lizartzan. Ikusi hemen egitaraua.
