Lizartzako Guraso Elkarteak gaztainak biltzera joateko irteera antolatu du. Igandean, hilaren 27an irtengo dira 10.30etan plazatik, eta Legorretako Koate auzoko gaztainadira joango dira. Bertan, Akaitz Sarasola lizartzarra eta Aintza Kortajarena asteasuarra izango dituzte bidelagun. Izan ere, Gaztainondoaren etnografia bat Tolosaldean ikerketa proposamenarekin Barandiaran beka irabazi zuen bikoteak.
Horrez gain, Lizartzako udazken kulturalaren bueltan, Zaindu, Elikatu eta Berotu izenburupean, gaztainondoaren kulturak Euskal Herrian izandako garrantziaz ariko dira, Tolosaldeko kasua aintzat hartuta. Urriaren 6an izango da saioa, 18:30etan, udal aretoan.