Eguerdirako egina zuten hitzordua, eta liartzarrak zintzo bertaratu dira, pilotaleku atarira. Udal ordezkaria dotore, eta txekorra ere prest, galako, ikus-entzule guztiak harritzeko. Horrela hasten baitira inauteriak Lizartzan, antzerkiz eta dantzaz. Eta, noski, janaz ere bai; gibela dastatzeko aukera izan dute herritar guztiek.
Zilarrezko inauteriak izango dituzte, aurten, Lizartzan, duela 25 urte ekin baitzioten, antzina ospatzen zituzten inauteriak berreskuratzeari. Horrela, gaurko ekitaldia lehen pausoa baino ez da izan, bi asteburutara zabalduko duten egitarauari ekiteko. Umoretik ekin diote, pilotaleku atariko esketxa bertsoz eta kantuz josiz. 25. urteurreneko tarta erraldoiari kantatu, eta kaldereroen aldarrikapenez egin dute frontoira sarrera, bertan Otsolar dantza taldearen eta herriko musikarien emanaldiaz gozatzeko.
Bihar ere egun berezia izango dute, besteak beste, 25 urteotako argazkiekin atondutako erakusketa inauguratuko baitute. Zilarrezkoak izan ala ez izan, lizartzarrek gozatu ederra hartu dute, eta hala oihukatu, gainera: "Gora Lizartzako inauteriak!".