Euskaraz ote den galdetu dio, ondoren. “Bai euskaraz da, gaztelerazko azpidatziekin”. Ez da ohikoa euskarazko film bat ikustea Leidorren, ezta euskarazko azpidatziekin ere, eskualdeko herritarren gehiengo handia euskaldunak bagara ere, egunerokoan txiki sentiarazten baitigute.
Leidor barruan nago jada filma hasteko zain. Ikaskide ohi altzotarra topatu dut bere familia guztiarekin aurreraxeagoko butaketan. Txikienak ere Handia ikustera etorri dira, beren herri txikia handia baita asteburu honetan.
Hasi eta buka, entretenigarri egin zait filma. Ondo kontatutako istorio unibertsala iruditu zait. Baliabide txikiekin emaitza handia.
Tolosako emankizunetan asteburu bakar batean 3.000 lagunek euskarazko film bat ikustea gauza handia da. Euskal Herriko beste herri askotan ere mukuru bete dira aretoak. Alorrez alor Handia gehiago behar ditugu. Sinistu dezagun erderen galbahetatik pasatu gabe euskaraz gauza handiak egin ditzakegula. Txikiak bai, baina ez exkaxak.
