Bederatzi urteren ostean, datorren urtean jokatuko da Gipuzkoako Herriarteko Bertso Txapelketa. Azken herriartekoan partaideen % 80 baino gehiago gizonezkoak izan zirela kontuan hartuta, emakumeentzako eta genero disidenteentzako bertso-eskolak antolatu dira eskualdez eskualde, eta Oihana Iguaranekin hitz egin dugu, hura izan baita Tolosaldeko taldea batzearen ardura izan duena. Goiz bateko saioak eman duena azaldu digu, eta esan digu gehiagorako gosez geratu dela jendea, eta izango duela honek jarraipena.
Elkarrizketa horren aurretik Beñat Azaldegi Gipuzkoako Herriartekoa antolatzeko ardura duen tolosarrarekin ere hitz egin dugu, eta txapelketaren nondik norakoak azaldu dizkigu.
Elkarrizketa eta elkarrizketa tartean, Amezketako San Martin auzoko ermitan, azaroaren 11n, San Martin egunez Bixente Gorostidi herriko semeak eta Anjel Mari Peñagarikanok librean egindako saioko bertsoak entzun ditugu.
