Uztailaren 9an bete ziren 200 urte Pernando Amezketa hil zela, eta hori dela-eta, Amezketako kultur etxeari Pernando Amezketarra Kultur Etxea izena jarri zaio. Ekitaldi egunean, abenduaren 2an, Pernandoren ibilaldian zehar paseoa eman zuten herritarrek, Agurtzane Garmendiaren azalpenak entzunez eta herriko zenbait aktorek antzeztutako pasadizoekin gozatu ederra hartuz.
Ondoren, kultur etxea bataiatu, Bixente Gorostiren eta Anjel Mari Peñagarikanoren bertso-saioa entzun, eta herritarrak talo-janera joan ziren. Bazkalostean, Zazpi Iturri Elkartean bildu eta Pernandoren garaitik gureganaino heldutako zenbait bertso kantatu ziren lagunartean.
Bitarte horretan guztian zehar grabagailua martxan izan genuen, eta horrekin osatu dugu irratsaioa.
Irratsaio amaierako kantua: "Pernando Amezketarra" (Hitzak: Txirrita; musika: Xabier Lete).