15:30etan Ibarran, Hauspoa Kultur Elkarteak antolatuta dozena lagun pasatxo elkartu ziren, eta Iñigo Gorostarzu eta Adur Gorostidi izan ziren koplariak; guk, herriguneko zenbait baserritako kantaldiak grabatu genituen. Handik Alegiarako bidea hartu genuen, 17:15etan, Barrioko plazan 60 herritarretik gora elkartu baitziren Txintxarri Abesbatza Kultur Taldekoen deiari erantzunez, eta Odei Lopez eta Maialen Akizu jardun ziren bertsotan. Tolosan, berriz, besteren artean Lizardi Kultur Taldekoak ere atera ziren ohitura zaharra berritzeko asmoz, eta 19:00etan hasita, alde zaharreko zenbait kantaldi grabatu genituen. Koplariak Danel Etxeberria eta Beñat Zeberio izan ziren, eta 100 lagun inguru bilduarazi zituzten; batzuk kantuak, besteak entzuten. Azkenik, nahiz eta bazkalondoan oso goiz hasi ziren, eguzkia ezkutatuta eta gaueko hotza lagun, Bidania-Goiatzeko zenbait kopla grabatu genituen; haizea ere grabagailura sartu nahian borroka ibili behar izan bagenuen ere. Ander Lizarralde eta Arkaitz Zelaia izan ziren kantuan, eta Kukuri Elkartekoek bi dozena lagunetik gora elkartuarazi zituzten.
Irratsaio amaierako kantua: "(min)bizi" (hitzak: Oihana Iguaran; musika: Xabier Zabala; ahotsa: Idoia Asurmendi).