Gipuzkoako Eskolarteko Finala ospatu ondorengo astean, martxoan Anoetan jokatu zen kanporaketa ekarri dugu gogora eta baita, Gipuzkoako txapeldun berriak, Oihana Aranak iazko Gipuzkoako Herriartekoan Anoetan egindako bakarkakoa ere.
Horrez gain, Maddalen Arzallus-ekin ere hitz egin dugu telefonoz, bera baita Bidania-Goiazko bertso-irakaslea eta bere ikasleek irabazi baitute IV. Pedro Mari Otaño idatzizko sariketa. Apirilaren erdialdean jaso zuten oparia, Maialen Lujanbioren bisita eta Arzallus irakasleak kontatu digu nola joan zen bisita hori. Horrez gain, Mikel Artola Gipuzkoako Bertsozale Elkarteko kideak Gipuzkoako Eskolarteko finalaz hitz egin digu eta baita maiatzaren 6an ospatuko den Gipuzkoako Bertsoeskolen Egunaz ere, aurten Tolosan ospatuko baita. Bertan izango ditugu 100 gaztetxotik gora Tolosako kaleetan zehar.
Amaitzeko Asteasuko aurreko asteko hitzaldiko azken bertsoak entzun ditugu eta Mikel Urdangarinen azken diskoko kantu batekin agurtu zaituztegu, hurrengo asteko programa berezira arte.
