Maiatzean ezarri zuen 13,37ko markatik urrun ibili da gaur Cabang Parisko Stade de Francen egin den 110 metroko hesien proban. Estreinakoz lehiatu da atleta irurarra olinpiar jokoetan eta bere txandan irteera ona egin badu ere, ezin izan du finalerdietara sailkatzerik lortu. Helmugako marran, 13,66ko denbora ezarri du Filipinetako selekzioarekin lehiatzen duen irurarrak, eta Jakub Szymanski poloniarraren eta Martín Sáenz txiletarraren aurretik geratzea lortu du.
Bigarren eta azken aukera asteartean
Finalerdietarako txartelik lortzerik ezin izan duen arren, asteartean bigarren aukera bat izango du John Cabangek. Gaurko moduan, irurarra Stade de Francen lehiatuko da 10:50ean.
