Adunako beroketa saioan parte hartu zuen, baina, horrez gain, ez du bestelako prestaketa berezirik egin orain arte. «Giro polita izan genuen eta aukera ederra izan zen txapelketako formatua probatzeko. Hala ere, ez nintzen oso pozik geratu nire lanarekin», azaldu du.
Datorrenari begira, irurarrak erronka garbi bat jarri dio bere buruari: «txapelketaz gozatzea eta barrutik nola bizitzen den ikastea». Txapelketan zer egin nahi duen galdetuta, bi helburu aipatu ditu: «Eman dezakedan maila plazaratu nahiko nuke, eta neure burua estutu, daukadan onena emateko».
Bertsotan egin beharreko ariketen artean, ez dago bakar bat gustukoagoa duena, edo erosoago sentitzen dena. Hala ere, bada bat gehiago prestatzen ari dena: «Arreta berezia jartzen ari naiz ganbaran».
Mendiluzek maiatzaren 10ean, ostirala, kantatuko du Mutrikun. Zabiel Kultur Etxea izango da saioa, 19:00etan hasita. Ondorengo bertsolariak ariko dira: Ane Peñagarikano Leiva, Izarne Zelaia Arratibel, Iñigo Gorostarzu Etxebeste, Jon Mendiluze Mujika, Josu Ibarguren Elosegi eta Manex Astigarraga Bergara.
