Otsailaren hasieran hasi zen Ikaztegietako Udala herriko azpiegiturari buruzko hainbat gai jorratzen, hain zuzen, elizaren ondoko parkea berritzea eta herriko tabernaren eta dendaren etorkizuna. Bada, ostiral honetan, beste hitzordu bana egingo dute gaiak lantzen jarraitzeko.
Lehen hitzordua elizaren ondoko parkeari buruz izango da, 17:00etan, eta udaletxeko batzar aretoan bilduko dira. Aurreko hilabetearen hasieran herritarren proposamenak jaso zituen udalak eta, horietatik abiatuta, aurrekontuak eskatu dituzte; bada, orain, erabakiak herritarrekin batera hartzeko deitu dute bigarren bilera.
Herriko ostatuaren etorkizuna lantzen garai bertsuan hasi ziren, eta beste esperientzia batzuen berri izateko Bakaikuko eta Olatukoopeko kideek hitzaldi bat eman zuten Ikaztegietan. Ostiraleko batzarraren helburua da, berriz, ezagutzea zer egin nahi duten eta zer egin dezaketen herriko tabernarekin zein dendarekin eta «batez ere» zehaztea zertarako dauden prest herritar eta udal gisa. Bigarren hitzordu hori 18:00etan hasiko da, egun eta leku berean.
