Elizaren alboko parkea berritzekotan dira Ikaztegietan eta erabiltzen dutenen iritzia jaso nahi dute aurrera egin baino lehen. Horretarako bilera irekia egingo dute gaur, 17:00etan, udaletxeko batzarren aretoan. Alba Garmendia alkateak azaldu du bi aukera aurreikusi dituztela: kentzea eta berritzea.
«Herrian galdetu dugu eta besterik gabe kentzea ez dute ikusten aukeratzat. Parkean biltzen diren guztiei zabaldu diegu bilerarako deialdia, eta helburua da proposamenak jasotzea», horrela hitz egin du Garmendiak lanketaren inguruan eta gehitu du eskolari ere galdegin diotela iritzia, eta haiek euren kabuz landuko dutela gaia erantzun dietela esan du. Behin proposamenak jasotakoan udal taldeak landuko du bere aldetik, aurrekontuaren barruan eskakizunak sartzen saiatuko dira eta horren arabera aterako dute lizitazioa.
Berritzeko kostua eta pausoak
Elizaren ondoko jolastokia «oso zaharkitua» dagoela nabarmendu du alkateak, eta lege berriak errespetatzeko berritu egin behar dela. Balizko parke berria «ahalik eta gehien» integratu nahi dute inguruko elementuekin, besteak beste, plazarekin eta beste jolastokiekin; eta materialei dagokienez, berriz, aurreratu du oraindik ez dutela ezer erabakita. Momentuz 30.000 euroko aurrekontua aurreikusi dute: «Orain dagoena berritzeak zenbateko kostua izango lukeen kalkulatu dugu, eta gutxi gorabehera hori da zenbatekoa. Baina ez da betierekoa, aurreikuspen bat da».
Aurtengo udal aurrekontuan aurreikusi dutela-eta, parke berria urte honen barruan bukatu nahi dute: «Diru laguntzetara aurkeztuko dugu eta horrek eragingo du epeetan. Eskolako oporrek eta eguraldiak ere baldintzatuko dute, baina aurten izango da, ziur».