Ibarrako Udalak urteak daramatza bizikletak aparkatzeko zerbitzua ematen hainbat helburu medio, besteak beste, bizikleten erabilera sustatzeko eta horiek modu seguruan gordetzeko lekua eskaintzeko, aire libreko jarduera fisikoa sustatzeko, eta berotegi efektua eragiten duten gasen (BEG) emisioak murrizteko.
Martxoan, esaterako, Ibarrako Beko Bide kaleko 10. zenbakian dagoen lokala bizikletentzako 100 aparkaleku seguru egokitu zituen udalak, «udalerria beste aparkaleku kolektibo eta seguru batzuez hornitzeko eta bizikletaz mugitzen diren herritar guztientzako bizikleta-plazen eskuragarritasuna hobetzeko».
Orain, kaleko bizikleta aparkalekuei heldu nahi izan die. Izan ere, udaletik azaltzen duten moduan, «ikusi da Uzturpe ikastolako ikasle askok bizikleta erabiltzen duela Ikastolara joateko garraiobide moduan, eta ondorioz, plazan dagoen bizikleta aparkalekua eskasa geratu da».
Bizikleta-aparkaleku eskaintza handitzearren, plazako estalpearen atzealdean zegoen bizikleta aparkalekua –16 plazakoa– bertatik kendu eta Eguzkilore tabernaren atzealdera lekualdatu da, kopuru berako beste bizikleta aparkaleku bat ondoan erantsiz. Honela, Eguzkilore tabernaren atzealdean 32 bizikleta uzteko tokia egokitu eta plazako estalpearen atzealdea libre utzi du udalak, herriko festetan edota asteburutan antolatzen diren ekintzatan espazioa libre uzteko.
Plazako komunaren ondoko bizikleta aparkalekua –8 plazakoa– bere horretan utzi da, eta baita San Bartolome kalea 13ko etxebizitzaren aldamenean dagoen beste bizikleta aparkalekua –8 plazakoa– ere.
Guztira, beraz, 48 bizikleta uzteko tokia geratu da plaza inguruan; 16 plazan eta 32 Eguzkilore tabernaren atzealdean.