Tolosaldeak, berriz, ordezkari bat zuen bertan: Jexuxmari Mujika. Lan bikaina egin zuen ibartarrak, eta bigarren postua eskura izan zuen laugarren enborra amaitzean. Bi geratzen ziren, eta Ruben Saralegi bakarrik zuen aurretik. Xabier Zalduak, ordea, laugarren enbor horretan egindako akatsari buelta eman zion, eta Mujikari amaieran 21 segundo atera zizkion.
Ruben Saralegi hasieran nagusi izan zen. Leitzarra lehen mailako aizkolaria da, eta herenegun hori erakutsi zuen, lasaitasunez finala irabaziz. Zaldua fisikoki bikain dago, Arria V.aren aurkako apustuaren atarian. Aizkoran zer hobetua baduen arren, merezita lortu zuen bigarren postua eta lehen mailarako bigarren txartela. Laugarren Mieltxo Mindegia geratu zen. Kilo askoko aizkolaria da zubietarra, baina aldi berean, fina. Bere aizkora lanean ikustea beti da gozagarri. Aratz Mugertza bosgarrena izan zen, egun txar batean. Kanporaketan lehena sailkatu zen Julen Kañamares izan zen seigarrena. Mugertza III.ari bezala sufritzea tokatu zitzaion Arostegikoari.
Sailkapena
1. Ruben Saralegi 19.59
2. Xabier Zaldua 20.53
3.Jexuxmari Mujika 21.14
4. Mieltxo Mindegia 21.28
5. Aratz Mugertza 23.17
6. Julen Kañamares 23.36
Irakurri hemen Jexuxmari Mujikari egindako elkarrizketa.
