Urriaren erdialdean Euskal Herriko Raid Txapelketa irabazi zuen ibartarrek osatzen duten Euskal Raid Aralar Kirolak taldeak, txapelketako bost probak irabazita. Denboraldia amaitzeko, ordea, azken lasterketa bat falta zitzaien.
Haisera batean Kataluniako Txapelketan parte hartzekoak ziren, baina azkenean Extremadurara joan ziren, Espainiako Ligako azken proban lehiatzera. "Biak asteburu berean tokatu ziren eta azkenean Extremadurara joatea erabaki genuen" azaldu du Garmendiak.
Bi eguneko raida izan zen. Larunbatean, 143 kilometroko bidea osatu behar izan zuten 14 ordutan, trekking edota mendi bizikletako sei etapatan banatuta. Igandean, berriz, 41 kilometro egin zituzten lau ordutan.
Taldeek hiru partaidez osatuta behar zuten, eta Haitz Larrinaga ondarrutarra izan zen ibartarren bidelagun. Elite mailan hartu zuten parte, eta ez zen beharrezkoa taldean neskaren bat egotea.
Hirugarren postuan amaitu zuen raida hirukoteak. "Oso gustura geratu gara egindakoarekin, denboraldiari amaiera bikaina eman diogu" aitortu du Maitane Garmendiak.