Kirolaren eta lehiaren txanda izan da Bidaniako San Bartolome jaietako azken egunean. Herriko frontoiaren inguruak jendez bete da 18:00etarako, Bidania eta Errezilen arteko desafio mistoak ikusmina sortzen duen seinale.
Bidaniaren eta Errezilen arteko desafioa egin dute lehenengo. Ergometroan, 2,5 kilometro egin dituzte; Bidaniatik Iñaki Elola aritu da ergometroari tiraka eta Josu Uzkudun Erreziletik. Soka saltoan 100 salto egin dituzte Ane Elolak eta Garazik. Bizikletari eman diote lekukoa gero; Iosu Elola bidaniarra eta Jokin errezildarra aritu dira pedalei ematen. Amaitzeko, frontoi inguruari bost buelta eman dizkiote Eneritz Iraolak eta Izaro Zinkunegik. Iraolak zeharkatu du helmuga lehenengo, eta beraz, Bidaniak irabazi du desafioa.
Bidaniarren eta goiaztarren arteko herri kirolak egin dituzte ondoren. Aurretik, erakustaldia egin dute aizkolariek eta harri jasotzaileek. Hain zuzen, Jon Irazu eta Joseba Otaegi aritu dira aizkoran eta Aimar Galarraga, Joseba Ostolaza eta Goiatz eta Uxue Galarraga neskatilak, harri jasotzen. Herri kirolak egin dituzte gero, eta harri jasotzen, aizkoran, trontzan, ingudea, txingak, lokotxak biltzen eta korrika aritu dira eta lau txanda egin behar izan dituzte. Azkenean, goiaztarrek irabazi dute lehia.
Gauean, Maialen eta Irati trikitilariak arduratuko dira azken gaua alaitzeaz.
Ikusi hemen egitaraua.
