Urte berezia izan da Bidania-Goiazko herritarrentzat, eta urtea lanean eman duten guztiei eskerrak emanez hasi zuten harrera ekitaldia. "Urte beteko lana besterik ez da hau, jada 27 urteko lana da, eta horiei ere eskerrak eman behar diegu", gaineratu zuten.
Orain 27 urte lanean aritu zirenak ere izan zituzten gogoan. "Eskola txikiak garrantzitsuak dira Bidania-Goiatz bezalako herri txikientzako". Txinkorta eskolako ikasle eta irakasleek txalo zaparrada ere jaso zuten. Eta jai eguneko protagonistak eskolako txikiak zirenez, beraiei ere eman zieten lekukoa eta kantari aritu ziren.
Bazkaltzeko garaia iritsi bitarte kross txikiak, tailerrak, puzgarriak, jolasak izango ziren txikienentzat. Eta arratsaldean Pirritx, Porrotx eta Marimotots pailazoen emanaldi arrakastatsuaren ondotik, jokoak egon ziren eskolan. Egun guztian, gainera, jaiaren 'Biraka!' abestia egin duten Skandalue elektrotxaranga ibili zen herrian.
