Atzo hasi ziren San Agustin jaiak Berrobin. Gaur, berriz, gozatzeko eguna dute bertan. Batetik, haurrek, mota guztietako jolasetan parte hartzeko aukera dute. Bestetik, gazte zein helduek bazkal orduan bilatu dute aisialdirako unea. Batzuek paella jatean; besteek, Bide-Ona elkartean ospatu den bertsoz lagundutako bazkarian.
Paella bazkarian herritarrak nahiz jada herrian bizi ez diren baino bertan jaiotakoak diren berrobitarrak elkartu dira. Guztiak ere, lagunartean gerturatu dira, eta norberak bere otordua prestatu ondoren, mahaien bueltan 100 bat lagun zeuden. Elkartean, bestalde, bazkideek prestatutako bazkaria dastatu dute, gero, Aitor Mendiluze eta Sebastian Lizasoren bertsoak entzuteko aukera izan dutenek.
Iluntzean, sardina jatea ospatuko da, eta gauean, DJ saioaren ondoren, bakeroen mozorro lehiaketa eta Maite Agirrek zuzendutako Zoom-Zumba saioa izango dituzte. Bihar, berriz, jaiegunarekin batera, herri kirolez nahiz musikaz gozatzeko aukera izango da Berrobin.
