Suziria bota aurretik bertsoa abestu dute Ekintzakoek. "Festetan parte hartuz / jar dezagun gogoa / herritarrek egina / hori baita ona", kantatu dute besteak beste udaletxeko balkoira igo diren elkarteko ordezkariek.
Suziria lehertu ondoren, udaletxetik goxokiak bota dituzte eta jarraian atera dira buruhandiak. Plazan eta inguruan korrika ugari egiteko aukera izan dute haurrek. Bost egunez festa giroa izango dute.
Aurtengo txupinazoa ohikoa baino beranduxeago izan da, eta bizikletan irteera egitera joan diren herritarrak bertan izan dira. Hamaika izan dira aurten atera direnak, ohi baino gutxiago. Eguraldiak zerikusia izan duela azaldu dute txirrindulariek. 60 kilometroko itzulia egin dute, Lizartzatik pasa, Azpirotz igo, gero Lekunberritik Uitzi eta Leitza aldera joateko, azkenean Urto igo eta Berastegitik Berrobira iristeko. Badira 37 urte ohitura hori dutela herrian, eta espero dute beste horrenbeste urtetan jarraitzea.