Txupinazoa bota eta Benidormera egin dute alde herriko adinekoek. Horrela hasi dira inauteriak ospatzen Berastegin, eta egun osoan luzatuko dute mozorroen festa. Suziria lehertu eta karameluak jaurti ondotik, herriko kuadrilla pare batek dantza egin du udaletxearen plazan, eta txalo artean jaso dituzte herritarrek.
Adinekoz mozorrotuta txupinazoa bota dutenek autobusa hartu eta herritik alde egiteko keinua egin dute, eta plazan izan dira bestelako mozorroak ere, horien artean, rock zaleak, Azaburu eraikuntza enpresako kideak, ezkonberriak, apaizak, animaliak eta yogiak.
Segidan bazkari herrikoia izango dute pilotalekuan. Eta arratsaldera begira, berriz, 17:30ean hasiko da kalea girotzen Laskotxaranga; eta, iluntzean, luntxa eta DJa izango dituzte Urepele elkartean.
