Ostegunean eman zieten hasiera berastegiarrek aurtengo Kultur Asteari. Datozen egunetan hamaika ekintzez gozatzeko aukera izango da, eta gaur arratsaldean, Mus Txapelketa Herrikoiaren txanda izan da. 15:00etarako Ategi Ostatura gerturatu behar zuten parte hartu nahi zuten herritarrek, eta azkenean, hamabi bikotek eman dute izena. Behin txapelketa amaituta, 19:00etan, pintxo-potea egingo dute herriko taberna eta ostatuetan, eta baita gaztetxean ere.
Bihar, berriz, antzerki emanaldi bikoitza izango da Berastegin. Batetik, 12:00etan, Frontona ikuskizuna eskainiko dute herriko frontoian. Eskualdeko hainbat aktorek hartzen dute parte obra honetan: Iñigo Otaegi, Unai Ormaetxea, Josu Artutxa, Anne Maiza eta Janire San Sebastian. Bestetik, 19:30ean, Gu primer! antzezlan musikatua eskainiko dute Ramon Agirrek, Inazio Tolosak eta Nerea Gorritik, eskolako gimnasioan.
Asteburuko eskaintzaz gain, astelehenean (jai eguna dela aprobetxatuz) nahiz datorren astean zehar, kultur ekitaldi gehiago izango dira Berastegin. Ikusi hemen egitaraua.