Aurten, kanpoan egon da ikasten Zeberio. «Ohiko bertso eskolez gain, tamalez, ez dut prestaketa berezirik egiteko aukerarik izan», adierazi du.
Asteasuarrari zaila iruditzen zaio txapelketara pasatzea, kantatzen duen lehen aldia delako. «Kanporaketa txukun bat egin eta gustura gelditzea izango da helburua. Nire maila erakutsi nahiko nuke, hanka sartzerik egin gabe».
Orain arte kantuan aritu den testuingurua erabat bestelakoa izan da; eskolarteko txapelketetan egin izan du bertsotan asteasuarrak. Hori dela eta, bakarkako lanari eman dio garrantzia azken asteetan: «Ez nago ohituta bakarkakoetan bertso bat baino gehiago kantatzera. Beraz, ariketa honi eman diot enfasi handiena».
Zeberiok maiatzaren 3an, ostirala, kantatuko du Legorretan. Herri Antzokian izango da kanporaketa, 19:00etan hasita. Ondorengo bertsolariak ariko dira: Ane Zuazubiskar Iñarra, Beñat Zeberio Mateos, Gorka Maiz Alustiza, Maialen Akizu Bidegain, Naia Arrizabalaga Arrieta eta Unai Izagirre Etxeberria.
