Partida luzea eta gogorra jokatu dute Maider Mendizabalek eta Amaia Irazustabarrenak, Munduko Euskal Pilota Txapelketaren finalaurrekoan. Mexiko zuten aurkari gaur eguerdian, eta lehen set-a 15-9 galdu dute. Mexikarrek segurutik jo dute, pilota galdu gabe jokatuz. Maider Mendizabali kosta egin zaio partidari neurria hartzea, eta hainbat pilota galdu ondoren, markagailuan ihes egin diete erraz mexikarrek (5-4; 10-4; 14-6).
Bigarren set-a borrokatuagoa izan da. Berdinketak nagusitu dira, eta 8nakoan, euskaldunek hautsi eta zabaldu dute tartea. Hiru tantoko aldea zabaldu dute eta errentari eutsi diote 15.era iritsi arte.
Hirugarren eta azken set-a 10 tantora jokatu da. Mexikarrak 4-1 aurreratu dira hasi orduko. Mendizabalek eta Irazustabarrenak ez dute etsi eta partida berdintzea lortu dute: launa aurrena, bosna ondoren eta seina azkenik. Hori iritsi da partidako gakoa, 6-7koarekin hartu dute euskaldunek aurrea, eta ez diote ihes egiten utzi. Amaieran, 8-10.
Finala larunbatean jokatuko da, 10:00etan, eta zuzenean jarraitzeko aukera dago. 13:00etan Eneko Maizek jokatuko du, Baptiste Ducassou angelutarraren aurka.
