Eskualdeko 12 eta 18 urte bitarteko gazteei zuzenduriko Bideo-Podcast Lehiaketa antolatu du ATARIAk, Laboral Kutxaren babeslegotzarekin. Guztira sei taldek eman dute izena Tolosaldea Zure Ahotik Lehiaketan eta Zer diozu Tolosaldeaz? galderari erantzun diote, eta euren irudimena eta trebezia uztartu dituzte. Ekimenaren helburua Tolosaldeko gazteek eskualdea nola irudikatzen duten ahoz eta irudiz islatzea izan da, parte hartzea eta talde lana sustatu eta balio positiboak bultzatuta, bideo originalen ekoizpen eta difusioaren bidez. Eta baita lortu ere.
Sari banaketa ekitaldia gaur izango da, 18:00etan Villabonako Subijana etxean. Hiru sari banatuko dira bertan: 12 eta 15 urte artekoen saria, 16 eta 18 urte bitartekoena, eta webguneko erabiltzaileek bozketa bidez aukeratutakoa. Lehen biek Tolosa, Villabona eta Ibarrako saltokietan erabiltzeko bonuak jasoko dituzte.
