Alvarezek proiektu eolikoaren poligonala plano batean marraztu du. Horretarako, Euskal Herriko buletin ofizialaren 2025eko martxoaren 27ko alean Eusko Jaurlaritzaren Industria Sailak proiektu honen inguruan argitaratutako iragarkian emandako koordenada geografikoak baliatu ditu. Lehenengo, 1:25.000 plano batean marraztu du eta, gero, mendiko plano batean kopiatu. Poligonalak lurralde oso zabala hartzen du: 6 km2 inguru bi aerosorgailurako.
Bestalde, LPS Lurralde Plan sektorialaren inguruko bi plano ere landu ditu Alvarezek. Lehenengoan, LPSaren behin-behineko onarpenaren dokumentuko planoa ikusten da, 2024koa; bigarrengoan LPSaren hastapen onarpeneko dokumentu planoa, 2023koa. Amasamendin halako instalazio eoliko handiak hartzeko duten «ahalmen» edo «harrera gaitasuna» aldatuta ikusten da batetik bestera. Eusko Jaurlaritzak goranzko aldaketak egin dituela dio Alvarezek, «modu zeharo irregularrean eta justifikaziorik gabekoan».
