Amasa-Villabonako Udalak behin behinean desaktibatu egin du oroimenaren webgunea. "Aranzadik egindako lan zientifikoa behin-behinean ez da eskuragarri izango, zientzia elkarteak hala eskatuta", irakur daiteke une honetan web gunean. Erabaki bera hartu dute EH Bilduren udal gobernua duten beste hainbat udalek ere, hala nola, Hernani, Oiartzun, Azpeitia eta Oriok.
Galdakaon piztu zen polemika, PSE-EEren taldeak udal gobernuari Galdakao Oroimena webgunetik ETAko kideen izenak kentzea eskatu zionean, "giza eskubideen urraketen biktima gisa" agertzen direlako. Gerora, Covitek salatu zuen herri gehiagoren oroimen webguneetan ageri zirela ETAko kideak biktima gisa, eta tartean aipatu zituen Tolosa eta Amasa-Villabona. Espainiako Gobernuaren ordezkaritzak, berriz, hilabeteko epea eman zien zenbait udali, webgunean aldaketak egiteko.
Aurreko astean Tolosako Udalak webgunearen bilatzailea desaktibatzea erabaki zuen, eta orain, EH Bilduko udalek hartu dute erabaki bera, zehaztu dutenez, Aranzadi zientzia elkarteak horrela eskatuta.
Aranzadik egunotan esana du prest dagoela eragile instituzional, politiko, akademiko eta sozialekin lankidetzan aritzeko, «irizpideetan eta metodologian egin litezkeen aldaketei edo hobekuntzei buruzko hausnarketa bateratua egiteko beharra balute». Baina betiere «independentzia zientifikoz jardunez» ariko litzatekeela ohartarazi du.