Istilu horiek eragindako kalte eta ondorioak nabarmenak izan direla esan du Villabonako Udalak ohar bidez, eta larunbat gauean bizi izandakoa tamalgarria eta justifika ezina dela esan du. "Udalak beste behin, arduraz jokatzeko eta COVID-19ari aurre egiteko ezarri diren prebentzio neurriak errespetatzeko egindako eskaerak errepikatu nahi ditu. Gogorarazi nahi dugu pandemia aroan jarraitzen dugula, aurten ez ditugula Santio jaiak ospatzen eta ondorioz, Villabonara gaueko festa eta parranda egitera ez etortzea eskatzen dugula", gehitu du. Amaitzeko esan du, gertaerak ezin direla errepikatu eta bere eskuetan dagoen guztia egingo duela hala izan dadin.
PSE-EE alderdiko Maria Luisa Arija zinegotziak ere gertakariak onartezinak direla esan du, "tamalgarria da, Villabonaren izen ona zikindu dute gutxiengo batzuk". "Beti egin dugun bezala, alkatearen esanetara gaude, egungo egoeran ezinbestekoa baita alderdi politiko guztiak batuta eta koordinatuta egotea COVID-19aren bosgarren olatuaren gainean", gaineratu du Arijak.
