Nola jakin zenuen ekimenaren berri?
Oria merkatari elkartearen bitartez. Asko gustatzen zait erakusleihoak prestatzea eta antolatzen diren ekimenetan parte hartzea. Interesgarria iruditu zitzaidan eta izena eman nuen.
Zein da Poppy Northcutt?
NASAn lan egin zuen lehenengo emakumea izan zen. Matematikari eta ingeniaria zen eta gero zuzenbidea ikasi zuen. Oraindik bizi da, 77 urte ditu.
Nondik jaso duzu Northcutti buruzko informazioa?
Elhuyar fundazioak esleitu dio saltoki bakoitzari dagokion zientzialaria eta esleitzearekin batera bere inguruko informazioa bidali digu. Gero, nik nire aldetik, bere bizitzaren inguruko liburuak irakurri ditut eta asko sakondu dut bere biografian.
Nola antolatu duzu erakusleihoa?
Apolo programan parte hartu zuenez, astronauta bat eta espazio-ontzi bat bururatu zitzaizkidan aurrena. Planeta batzuk ere zintzilikatu ditut sabaitik eta irudikatu dut ilargiaren zorua. Kartelak Internetetik lortu ditut. Etorkizuneko emakume eta neska zientzialariei keinua egiteko probeta batzuk jarri ditut.
Denbora asko pasa duzu dena prestatzen?
Ordu dezente eskaini dizkiot. Lanetik aterata jardun dut dena prestatzen eta igande batzuk ere eman ditut lanean.