Aurten udalen artean 486 milioi euro banatzea aurreikusia zuen Gipuzkoako Foru Aldundiak eta aste honetan jakinarazi du kopuru hori gainditu egingo duela, eta 503,2 milioi euro banatuko dituela herrialdeko udal erakundeen artean. Aurreikusitakoa baino 18 milioi gehiago dira, horietatik 1,2 milioi euro Tolosaldeko udalentzat, eta zehazkiago, 145.000 euro gehiago Amasa-Villabonako Udalarentzat.
Transferentzia ekonomiko hau hurrengo urteko urtarrilean egingo da eta Udaleko diruzaintza soberakin orokorrera gehituko da. Ekarpen hau, 2018ko sarrera moduan kontabilizatuta geldituko den arren, gertu daukagun 2019an erabili ahal izango da kredituen aldaketa baten bitartez. Gobernu taldearen ideia, oraindik ere definitu gabe dagoen proiektu estrategiko batean erabiltzea izango litzateke. Maite Izagirre alkateak dioenez, “kantitate ekonomiko hau bideratzeko helmuga desberdinak aztertzen ari gara, gure udalerria modernizatzeko balioko luketenak”.