Gastearenari ekainean amaitzen zaio kontratua Realarekin, eta klubak jakinarazi du ez diola berrituko. Jokalari billabonatarren egoera berean dira Titay Calvo, Naiara Beristain eta Michi Goto.
Cristina Cornejo, Leyre Fernandez eta Claudia Zornozak ere kontratua amaitzen dute ekainean, eta klubak berritzeko eskaintza egin badie ere, aditzera eman dute ez dutela onartzen eskaintza. Hortaz, zazpi jokalari horiek ez dute talde txuri-urdinean jarraituko. Realak bere «esker ona» adierazi die guztiei, izan duten «profesionaltasunagatik».
Itziar Gastearenak Tolosa CF-n hasi zuen bere ibilbidea futbolean, eta lau urtez aritu zen bertan. 2010. urtean, 17 urte zituela, Realak fitxatu zuen, denboraldiaren erdian. Gerora, beste zazpi denboraldi egin ditu talde txuri-urdinarekin, zelai erdian, hasieran eta, azken urteotan, defentsa lanetan. Kapitainaren besokoa ere eraman izan du, tarteka.
2016an, denboraldia amaitzear zela, lesio larria izan zuen Gastearenak. Lotailu-haustura izan zuen eskuineko belaunean, eta ia urtebetez zelaietatik kanpo izan zen. Hain zuzen, orduan amaitzen zitzaion kontratua, baina klubak beste bi urtez luzatzea erabaki zuen. Gogorra izan zen min hartuta izan zen denbora hori, baina 2017ko apirilean itzuli zen berdegunera.
