Gipuzkoako Auzitegiak 12 urte eta 6 hilabeteko zigorra ezarri dio duela hiru urte istripua eragin zuen kamioi gidariari. Alkoholaren eraginpean 9 kilometro egin zituen N-1 errepidean, auto baten kontra jo zen arte. Autoak su hartu zuen eta bere gidaria, 43 urteko emakume errenteriar bat, bertan hil zen.
Carlos Manuel M.M., 54 urteko kamioi-gidaria zuhurtziagabekeriazko giza hilketa leporatuta atxilotu zuten egunean bertan. Legezko alkohol-tasa baino zortzi aldiz handiagoa zuen, 2,3 gramo odol litro bakoitzeko.
Tolosa eta Alegia artean dagoen gasolindegian egin zuen geldialdia garraiolariak eta lau orduz izan zen bertan. Denbora horretan alkoholdun edari ugari hartu zituela adierazi dute akusazioak eta fiskaltzak. Alkoholaren eraginpean egon arren, errepidera irten zen eta kontrako bidea hartu zuen, argirik jarri gabe, gainera.
Iñaki Sanchez, biktimaren familiaren abokatuak azaldu zuenez, autobidera irten bezain pronto gidari askorekin egin zuen topo, eta aurkako noranzkoan zihoala ohartarazi zioten behin baino gehiagotan. Kamioilariak, ordea, ez zien jaramonik egin eta aurrera jarraitu zuen, 441,4. kilometroan, Villabona parean, auto baten kontra jo zen arte.
Bada, hiru urteren ondoren iritsi da epaia: errepideko segurtasunaren aurkako delitua eta homizioa egotzi dizkiote garraiolari portugaldarrari, eta espetxean 12 urte eta erdi egin beharko ditu, nahiz eta Auzitegi Gorenean errekurtsoa jartzeko aukera izango duen. Gisa honetako lehen zigorra da Euskadin.