Alegian izan da Marta Pastor, Gipuzkoako Foru Aldundiko Kiroletako zuzendari nagusia, udalak martxan dituen obrak ikuskatzen. Joan den maiatzaren bukaeran hasi zituzten lanak Elorri futbol zelaian harmailak eraikitzeko eta pilotalekuko lurra zein gimnasioaren eta aldagelen espazioa berritzeko.
Futbol zelaiko obraren inguruan Regina Sorarrain alkateak nabarmendu du harmailak eraikitzea futbol taldearen «eskaera historiko» bat dela eta «aurrerapen handia» izango dela. Lan horiek 170.000 euroko aurrekontua dute eta ia 30.000 euroko laguntza eman du aldundiak.
Pilotalekuaren barruko lanei dagokienez, berriz, alkateak uste du «beltzetik zurira» pasako dela espazioa berrikuntza amaitutakoan: «Lurra zapalduta zegoen erabat eta harmailen azpiko espazioa erabat hondatuta zegoen. Bi tokiek berritzeko behar handia zuten». Lan horiek 530.000 euroko aurrekontua dute, eta 235.000 euro jasoko dituzte aldunditik gauzatu ahal izateko.
Sorarrainek nabarmendu du «aurreikusitako epeen barruan» doazela bi lanak eta aldundiaren «laguntzarik gabe» ez liratekeela «posible» izango: «Aurreikusitako epeetan goaz, eta lanak oso erritmo onean doaz. Garbi daukagu aldundiaren laguntzarik gabe inoiz ez zirela aurrera eramango obra hauek».
