Euskararen egunaren harira egitaraua antolatu du Alegiako Udalak. Goizeko 12:30ean hasiko dute jaia, trikiti poteoa egingo baitute Eider eta Maider trikitilariekin eta Alegiako erraldoiekin. Eguerdian, berriz, 14:00etan kantu bazkaria egingo dute Joxe Mendizabalekin kultur etxeko areto nagusian, eta arratsaldean zehar luzatuko dute.
Kantu bazkari horretara joan nahi duten herritarrek azaroaren 29ra bitartean erosi ahal izango dituzte txartelak kultur etxean, Iskiña tabernan eta Errotatxo okindegian. Helduentzat 10 euroko prezioa izango du eta haurrentzat, berriz, 5 eurokoa.
Helduen menua: hasierakoak, paella, postrea eta kafea.
Haurren menua: paella eta postrea.
Udalak parte hartzeko dei egin die herritarrei.
