Adin guztientzat antolatutako egitaraua

Alegiako udazkeneko egitaraua martxan jarriko da bihar eta abenduaren 2a arte. Nati Murua Kultura zinegotziak azaldu duenez, «adin guztiei zuzendutako ekitaldiak daude: ipuin kontalariak, helduentzako antzezlana, Mikel Urdangarinen emanaldia, Euskararen Eguneko hitzaldia...».

Hain justu, aurretik ez zuten behin ere udazkeneko egitaraurako abeslaririk ekarri, eta aurten Mikel Urdangarin musikari bizkaitarra lotzea lortu dute. Andoni Egañak euskararen inguruan egingo duen hitzaldia ere nabarmendu du Muruak: «Beste urtetan ere zerbait egin da Euskararen Eguna dela eta, baina aurten hitzaldi bat antolatzea pentsatu dugu. Interesgarria izango da eta animatu nahi diot jendeari bertara joatera».

Ohikoak diren hainbat ekitaldi izango dira, eta erantzun ona dutenak gainera. Ipuin kontaketak eta helduentzako antzezlana dira horren adibide. Txintxarri Eguna da udazkeneko beste klasiko bat eta aurtengoan herriko Txintxarri abesbatzarekin batera Legorretako Elekun abesbatza ariko da. Ondoren, eguna ohi bezala afariarekin bukatuko dute. Musikarekin lotuta ere, Loatzoko musika ikasleek Xexili Deunaren egunaren inguruan egiten duten emanaldia entzun eta ikusteko aukera izango da.

Kultura batzordetik antolatzen dute udazkeneko egitaraua, eta orain Eguberrien inguruko ekitaldiei begira jarriko dira. Hamabostean behin elkartzen da batzordea, eta Muruak herritar oro gonbidatzen du parte hartzera: «Bilerak irekiak dira, nahi duen guztientzat zabalik daude, eta ongi etorria izango da».