Herritarrak kantujiran ibili dira Adunan zehar. Trikiti eta pandejoleek jo dituzte lehen notak, eta herriari hainbat buelta eman ostean, elizako atarian egin dute geldialdia mezatik ateratzen ziren herritarrei harrera egiteko. Abestera ere animatu dira, eta lehen koplak abestu ostean, plazara bueltatu dira emanaldiarekin jarraitzeko.
Bien bitartean, epaimahai kideak tortilla lehiaketako platerak dastatzen aritu dira udaletxeko atarian. Lehiaketan parte hartu duten herritarrek kantujira hasi aurretik aurkeztu dituzte platerak; guztira, 13 parte hartzaile izan dira. Tortilla horiekin pintxoak egin eta herritarren artean banatu dituzte ondoren.
