Gipuzkoako Bertsolari Txapelketaren sailkapen fasea, Gipuzkoa Bertsotan, datorren apirilaren 25ean abiatuko da. Parte hartuko duten bertsolariek entrenamendu saioak izango dituzte datozen egunotan. Adunan, apirilaren 18an, 18:30ean Elordi elkartean egingo dute saio horietako bat. Iñigo Gorostarzu Etxorde berastegiarra, Jon Mendiluze irurarra, Txomin Azpiroz anoetarra eta Iker Ormazabal, Eli Pagola eta Ekain Tolaretxipi hernaniarrak ariko dira bertsotan. Igotz Alkortak jarriko dizkie gaiak.
Biharamunean txapelketarako beste entrenamendu saio bat egingo dute Hernanin. Sandiusterrin bilduko dira 19:00etan eta han Urnietako Andoni Mujika, Lasarte-Oriako Lierni Rekondo eta Hernaniko Andoni Rekondorekin batera eskualdeko hiru bertsolarik kantatuko dute: Beñat Iguaran amasarrak, Beñat Zeberio asteasuarrak eta Jon Luzuriaga ikaztegietarrak.