Datorren urteko Eskola Txikien Festa antolatzeko lanetan murgilduta dabil Aduna, joan den ekainean Lizartzan lekukoa hartu zutenetik. Lehen urratsa festa irudikatu duen logoa aukeratzea izan da eta igandean, azaroaren 19an, aurkeztuko dute kultur astearen barruan antolatutako ekitaldian. Eguraldi ona bada plazan eta euria egiten badu frontoian egingo dute ekitaldia 11:30ean hasita.
Aurtengo ekainean lehiaketa antolatu zuten festa irudikatuko duen logoa aukeratzeko. Irudia erakutsiko dute igandean eta bere esan nahia azalduko dute, eta horrekin batera, aukeraketaren nondik norakoak jakitera emango dituzte.
Adunako Eskola Txikien Festaren harira prestatutako materiala ere sagai jarriko dute, eta aurkezpenaren ondoren, pintxo-jana izango da gerturatzen den jendearentzat. Loatzo musika eskolako bandaren kontzertua ere izango da tartean.
Gipuzkoako Eskola Txikien koordinakundeko eta Gipuzkoa osoan zehar zabalduta dauden 27 eskola txikien sareko 2024ko festaren antolatzailearen logo aurkezpen ekitaldia izango da, beraz, igandean 11:30ean Adunako plazan.
