Xabier eta Eneko Zabalak ustekabean jaso zuten Kaikuren deia, joan den astean. Urte asko igaro dituzte TKE ligan lehiatzen, eta pasa den urteko denboraldia amaitzearekin batera, beren ibilidea bukatutzat eman zuten. "Anaiaren kasuan erabakia hartua zuen, baina nik duda asko izan nituen. Motibazio falta nuen, eta azkenean uztea erabaki nuen. Kortak deitu zigun arte...".
Kortarekin urtebete pasatzeak "merezi duela" nabarmendu du Eneko Zabalak: "TKE ligan esperientzia duen jendea behar zuela esan zigun. Baja asko egon dira taldean, eta gazte jende asko dago. Gazteei laguntzeko behar gintuela esan zigun, eta tira, baiezkoa eman genion. Esperientzia berria izango da. Gogorra izatearen fama du, baina orain ikusiko dugu Korta 'berdaderoa' existitzen den ala ez".
Taldekideekin alderatuta, 2 hilabete beranduago hasiko dituzte entrenamenduak. "Arraunkera berria hartzea izango da lan handiena, fisikoki oraindik badugu jartzeko denbora", dio Zabalak. Airilera bitartean asteburuetan bakarrik joan beharko dute, baina uda garaian, egunero joan beharko dute Sestaora.