Adunako Udalean prentsaren bidez enteratu ziren AHTaren lanak direla eta ur bide bat ireki eta ondorioz, lanak bertan behera utzi behar izan zituztela pasa den astean. Ostiralean izan zuen prentsak horren berri, baina antza, ostegun goizean izan zen istripua. Amilibiari lanetako zuzendariak hori esan dio behintzat.
Ostegun goizean ireki zuten ur bidea istripuz, eta ondorioz, bertan behera utzi behar izan zituzten lanak. "Materiala ateratzen ari ziren tokian izan zen istripua, eta ur asko atera zen, 500 metro kubiko orduko kopurura ere iritsi zela esan didate", esan du alkateak. 24 orduz egon zen ura ateratzen.
Istripua gertatuta AHTaren lanen arduradunek ur emaria kontrolatzeaz gain, errekak eta abar begiratzen aritu direla esan diote, istripuak uraren kalitatean eraginik izan ote zuen jakiteko, baina ondo daudela esan diote Amilibiari, eta ondorioz, lanekin jarraituko dutela gaurtik aurrera.
Udalean eta herrian ordea, kezkatuta daude. Honek mendiko iturrietan zein ondorio izan dituen jakin nahi dute; "ondorioak ikusi behar dira, ur emaria kontrolatu eta ura tratatu dutela diote, baina ez dakigu mendiko iturrietan zein eragin izan duen", esan du.
