Iaz, Plazandreak torneoa irabazi zuen Itxaso Erasun pilotari zizurkildarrak lau eta erdiko modalitatean. Aurten, berriro jantzi nahi du txapela, eta urrats bakarra geratzen zaio horretarako: finala irabaztea. Atzelaria izanagatik, espezialista da kaiolan, sufritzen badaki, lan handia egiten du, lau eta erdiko marra bikain bilatzen du, apenas egiten du oparirik eta tantoa amaitzen ere bikain moldatzen da. Ez da erraza izango ordea iazko garaipena errepikatzea, gaur egungo buruz buruko eta binakako txapelduna izango baitu aurkari: Enara Gaminde laukiztarra.
Herenegun jokatu zuen Erasunek Plazandreak torneoko ligaxkako azken jardunaldiko partida Bilboko Esperantza pilotalekuan. Itxura oso sendoa eman zuen Erasunek, eta 18-12 irabazi zion Aizane Ibarrola uhartearrari. Ibarrolak tanto bakarragatik galdu zuen astebete lehenago Gaminde finalistaren aurka.
Abuztuaren 10ean izango da finala, eta Euskal Telebistan emango dute. Egun batzuk lehenago, hilaren 6an, pilota aukeraketa egingo dute finalistek, 11:30ean.