Ostiral honetan hasiko da lehia bizia, bi partida jokatuko baitira, hurrenez hurren. Hortaz, datorren asteetan, pilotaz gozatzeko aukera paregabea izango da Zizurkilen. Uztailaren 17an hasi eta abuztuaren 13ra arte luzatuko da txapelketa. Zehazki, Zizurkilgo herriguneko festetan emango zaio amaiera VI. Intxaur Pilota Txapelketari; izan ere, festen egitarauaren barruan jokatuko diren azken partidetan erabakiko da zein pilotarik eskuratuko duen txapela eta, ondorioz, garaipena.
Ohi legez, hainbat maila eta kategoria izango ditu txapelketak. Alde batetik, promesa mailako txapelketa jokatu da, eta, bestetik, elite mailako partidak ere izango dira. Gainera, emakume kategoria ere izango du txapelketak. Bada, kategoria guztietako Hego Euskal Herriko eta Errioxako pilotari onenak izango dira Zizurkilen.
Afizionatu txapelketa horretan puntako pilotariek parte hartzen dute, eta, horregatik, Ainhoa Larrea Unzain Zizurkilgo Udaleko kirol teknikariak zera azpimarratu du: «Azkeneko urteetan profesionaletara salto egin duten pilotari asko pasa dira gure txapelketatatik». Bestalde, bere lekutxoa du txapelketak Zizurkilgo Herriguneko festen barruan, finala festetan jokatzen baita. Horrek txapelketak «herriarekin duen errotze maila handitzen» duela gaineratu du Izarne Zelaia Arratibel Kultura, Euskara eta Gazteria zinegotziak.
Pilotariak eta partida egunak
Guztira hamasei pilotarik parte hartuko dute. Promesa mailan Madina, Arnaolea, A. Egiguren, Nazabal, Sarasibar, Ramirez, Beitia eta Olasagasti izango dira. Elite mailan, berriz, Albizu, Etxaniz, Irribarria, Lizeaga, Olaizola, J. Alberdi, Zestau eta Hormaetxea. Emakumeen kategorian Arrillaga, Erasun, Gamindez eta Zabaleta arituko dira.
Hain zuzen ere, Zelaiak emakumeen kategoria azpimarratu du: «Intxaur Pilota Txapelketan emakumezkoen kategoria izatea garrantzitsua da guretzat, emakumezkoen pilota sustatu nahi dugu eta herritarrei deia egiten diegu emakumezkoen pilota partidez gozatzera hurbildu daitezen».
Bide batez, txapelketako partida guztiak ikusteko aukera izango da, eta lau egunetan jokatu dira sailkapeneko zazpi partidak. Hau da, lehen hiru egunetan (uztailak 17, uztailak 18 eta uztailak 24) bi partida ikusteko aukera izango da, eta uztailaren 26an partida bakarra ikusi ahalko da. Partida horixe, 18:00etan jokatuko da; besteak, aldiz, 12:00etan. Ostiral honetan, uztailak 17, promesa mailan elkarren aurka ariko dira Madina eta Arnaolea, eta elite mailan Albizu eta Etxaniz. Eta larunbatean, uztailak 18, promesa mailan A. Egiguren eta Nazabal ariko dira elkarren aurka, eta elite mailan Irribarria eta Lizeaga.
Hortaz, finalaurrekoak abuztuaren 1ean eta abuztuaren 8an iritsiko dira. Eta final handia, abuztuaren 13an jokatuko da, aipatu bezala, Zizurkilgo Herriguneko festen barruan. Emakumeen kategoriako partidak finalaurreko eta finaleko egunetan jokatuko dira. Partida guztietan sarrera doakoa izango da.